जीवन हा एक प्रवास आहे. जन्म झाल्यापासून ते मृत्यू पर्यंत हा प्रवास वेगवेगळी वळणे घेत पुढे जातो!यात एक अतिशय सुंदर वळण येतं जे एका जीवाला जन्म देतच पण आणखी दोन जीव सुद्धा नवा जन्म घेतात!बरोबर!पालकत्व हे ते वळण! हा प्रवास म्हणजे जबाबदारी असते तशी ती एक प्रयोगशाळा सुद्धा असते!

आई बाबा आणि मूल यांचा एकत्र प्रवास आता सुरू होतो!या प्रवासात काही वेळा समस्या जाणवते, प्रश्न पडतात आणि मग तो त्रासाचा वाटू लागतो!असं न होता हा प्रवास सुखाचा कसा होईल यासाठी केलेला हा एक प्रयत्न!

व्यक्तिमत्व विकासाचे पाच टप्पे किंवा पैलू भारतीय परंपरेत आणि मानसशास्त्रात मानले आहेत.शारीरिक, मानसिक, सामाजिक,भावनिक आणि आध्यात्मिक या टप्प्यांच्या आधारे आपले व्यक्तिमत्त्व उमलत जाते आणि ही प्रक्रिया अव्याहत सुरू राहते. असा विकास म्हणजे शरीर ,मन, बुद्धी यांचा विकास करणे आणि त्यातून समाधानी, आनंदी व्यक्ती म्हणून जगणे होय!

या कालदर्शिकेचा हेतू हा आहे की पालकांना मुलांना असे घडविणे शक्य व्हावे आणि त्यातून पालकांनीही स्वतः ला घडवावे!

आदरणीय गुरुजींचे 'पालकत्व' विषयातील अमोल विचार हा या सर्व उपक्रमाचा पाया आहे किंबहुना आदरणीय गुरुजींच्या प्रेरणेनेच आपण हे काम करीत आहोत.श्री. समीर नाईक यांचे मार्गदशन सुद्धा यामध्ये समाविष्ट केले आहे.

समर्थ रामदास यांनी दासबोध ग्रंथ लिहिला! स्वराज्य घडविणे यासाठी छत्रपती शिवाजी महाराज यांना त्यांनी जसा उपदेश केला तसाच तो सर्वसामान्य जनतेलाही केला!दासबोध आपला आरसा आहे म्हणजेच आपण कसे आहोत हे त्यातून कळते असे त्याचे महत्व सांगितले जाते. त्यामुळे मुलांच्या मोठे होण्याच्या काळात पालकांनी दासबोधातील विचार समजून घ्यावेत आणि मुलांना सांगावेत. संस्कृत ही देववाणी आहे असे म्हटले जाते. प्राचीन भारतीय ज्ञान संस्कृत भाषेतच तयार झाले आहे.

संस्कृत भाषेतील काही श्लोक ,मंत्र येथे अर्थासह दिले आहेत. ते पाठ करावेत. त्यामुळे जिभेचे वळण सुधारते आणि उच्चार स्पष्ट होतात.(संस्कृत श्लोक आणि मंत्र ऐकण्यासाठी website वर उपलब्ध आहेत)

आपल्या यशाचा मोठा भागीदार असते आपली दिनचर्या!आपण किती वाजता उठतो, काय खातो, कसे वागतो याचा परिणाम नकळत आपल्या विकासात होत असतो!प्राचीन आयुर्वेद शास्त्रात याला दिनचर्या म्हटले आहे आणि ती ऋतुचर्येशी जोडली आहे.म्हणजे कोणत्या ऋतूत कसे वागावे याचे हे नियम आहेत!

मूल म्हणजे गंमत!मूल म्हणजे मजा!आजच्या धावपळीच्या काळात आई बाबा आणि मूल असा एकत्र वेळ कमी मिळतो!पण असा वेळ नक्की काढा!या वेळात काय करता येईल सर्वांना मिळून ते ही यात सुचविले आहे! ते वाचून तुमच्या कल्पना शक्तीला ही चालना मिळेल!

प्रत्येक महिन्याच्या मागील पानावर पालकांना अशी माहिती उपलब्ध करून दिली आहे तिचा उपयोग तुम्ही नक्की कराल याची खात्री आहे!

Happy Parenting!

To Book your Copy call on 8087873761 OR 0 8180 952595

या दिनदर्शिकेत आपण मराठी महिने आणि त्या महिन्यात येणारे ऋतू सांगितले आहेत. कोणत्या मराठी महिन्यात कोणता सण येतो हे आपल्याला सांगते ती तिथी! चंद्राची वाढणारी आणि कमी होणारी कोर आपल्यला सांगते की हा पक्ष कोणता आहे?म्हणजे अमावास्येचा दुसरा दिवस असतो प्रतिपदा!पौर्णिमेला पूर्ण चंद्र आकाशात दिसतो या दरम्यानच्या पंधरा दिवसांना आपण शुक्ल किंवा शुद्ध पक्ष म्हणतो पौर्णिमा ते अमावस्या या काळात चंद्र लहान लहान होताना दिसतो आणि अमावास्येला आकाशात आपल्याला चंद्र दिसत नाही. या पंधरा दिवसांच्या काळाला कृष्ण पक्ष असे आपण म्हणतो! या पंधरा दिवसांना प्रतिपदा द्वितीया तृतीया अशी नावे दिली आहेत.

आपल्या कालगणनेत मराठी महिना आणि त्यातील तिथी चे महत्व काय?

उदाहरण पहायचे झाले तर

ग्रेगोरियन कालगणनेनुसार आपण म्हणतो की यावर्षी 25 मार्चला गुढीपाडवा आहे!खरं तर गुढीपाडवा हा दिवस म्हणजे चैत्र महिन्याच्या शुक्ल पक्षातील प्रतिपदा तिथी!

किंवा श्रावण महिन्यातील पौर्णिमा ही राखी पौर्णिमा म्हणून ओळखली जाते. ज्या ग्रेगोरियन तारखेला श्रावण पौर्णिमा असेल त्या दिवशी आपण रक्षाबंधन साजरे करतो! इंग्रजी कालगणनेचा प्रभाव आपल्यावर असल्याने आपण आपले मराठी महिने, तिथी यावर आधारित आपले सण उत्सव असतात हे अनेकदा विसरून जातो!!

कोणत्या मराठी महिन्यात कोणता ऋतू हे समजून घेणेही महत्वाचे ठरते!उदाहरण पहायचे झाल्यास उन्हाळा म्हणजे ग्रीष्म ऋतू हा मार्च एप्रिल मध्ये येतो!तर सुखद असा शरद ऋतू हा ऑक्टोबर नोव्हेंबर या इंग्रजी महिन्यात येतो असे आपण म्हणतो!पण इथे उलट विचार करावा लागेल कारण मराठी किंवा चंद्रावर आधारित आपली कालगणना ही ग्रेगोरियन कालगणनेपेक्षा खूपच जुनी आहे!

खरं तर भारतीय सौर कालगणना ही सर्वाधिक प्राचीन आणि खगोलशास्त्र दृष्ट्या अधिक शास्त्रीय मानली जाते!